بسم الله الرحمن الرحيم
السلام عليكم ورحمة الله وبركاته
ابيات متواضعه ارجو ان تنال بعض القبول منكم أحبتي
تبعثرني وتجمعني وتنضمني واذوق الويل
وهاجوسي يسافر بي على درب اللقا ثاني
وش اللي صار ما أدري ولكني بلا تهويل
إذا جيت انطق حروفك تشل حروفك لساني
أحاسيسي ونبضي ياقمر مع ذعذعات الليل
اترجمها لأجل خاطر عيونك وأبدع الحاني
عشقتك والسبب واضح وقلب العاشقين يميل
واذا مانته مصدق شوف كيف الحب اضناني
هويتك لعنبو جد الهوى مايعرف التمثيل
مضاريبه على قلبي تجدد حبي الفاني
تبسم ياحلو ذيك الشفايف ياجديل الخيل
وسلهم بالبحور اللي مدعجها على شاني
وعطني من ورودك وردتين بس مع منديل
وهات اعذب حكي يطرب مساميعي ويبلاني
على شان البشر ماتكشفك ياريح ورد وهيل
مكاني ماتغير وانت خابرني وتلقاني
تعال اقرب هنا جنبي وخلك في ضفاف النيل
وابشعل لك قناديلي وطف النور ياجاني
